dzornâ friboua

 

dzornâ friboua

Chu la thêne

Friboua, on tchinton au retsè tradihion mujikalè. On mache dè rèprèjintachyon chu la thêne è y katrè kotsè dè la fitha feron la pâ balà y kà è y fanfaron, ma achebin a la mujika kontanporèna è a nâ mache dè j’animachyon ke van chorèprindre lè vejatyà to d’oulon dè la dzornâye.

 
 

Thêne dè l’Aviron

In fathe d’où lé è di montagnè. La thêne dè l’aviron no propoujè ouna mujika pyènà dè varyièta, inkemahyâye pê di konto in patê.

Du 9 arè 30 patêjan, konchê dè tsan, fanfaron vo j’invitèron a vo j’arèthâ kotyè menutè por akutâ.

 

Scène d’où Rivâdzò

Ha scène chituâye ou kà dè la fitha va akuyi le kiosque a mujika du 11 arè 05 a midzoua è demi avu in anà, kà, fanfaron,groupe dè bachtringa. Le kortége chè fournethrè chu chi mimo l’indrê pê vè lè 17 arè avu on dichkour d’où préjidin d’où konchèyi d’Etha. Le programme va chouêdre avu ouna préchtachyion d’où kà Accroche-Chœur è chè va pochyêdre avu di konchê propoujâ pê l’artichte Marc Berube è lè ( high Five ) tanty’ou mitin dè la né.

 

Kurti Doret

Du le débu d’où dumidzouâ, di kà, van l’ou chukchèdà din le Kurti Doret po tsantâ di mèlodyiè Fribordzêjè dévan dè vo j’intrénâ chu le pon dè danthe a 21 arà avu (Silent Disco)

 

Scène d’ou Velâdzo d’ou Mondo

Le velâdzo d’ou Mondo va akuyi, fanfaron, fanfaron dè Kamintran, kouâ di Vani, è d’ôtrè kobyè to d’ou lon dè la dzornâye po fère a gurlâ to le lèvan dè la pyathe dè la fitha.

Din la vèyà, totè chouârtè dè kobyè è dè mujikè po pachâ ouna bouna vèya.

 

Tradihyon è tourichme

Balè yuvè, martchandi dè vêr no, mihyi dè la kotse, totè chouârtè dè veryè, le tyinton dè Friboua prèjintè on mache dè pochibilitâ por on indrê tourichtik. To chin, lè vijiteu poron le vêre on bokon pèrto in vela dè Vevey.

 
 

Lè Fribordzè in pèlerinâdzo

Modâdè a la dèkouvèrta dè l’ichtouâre di j’armayi è di venyolan. Du le « Domaine des Faverges », ouna verya d’inveron duvè j’àrè avoui di djido, vo bayèrè a konyèthre lè lin intrè le Lavaux è lè Fribordzè, è vo j’arouvèrê a pi ou kà de la fitha.

Informachyon pratika:

  • èmoda totè lè 15 menutè, intrè 8 è 12 àrè
  • chu inchkripchyon unikamin (vêre ôtro lin)
  • inpochubyo dè parkâ ou Domaine des Faverges : prindre le « Train des Vignes ». Du la gâre dè Chexbres, ouna pitita balada din lè venyè mênè ou Domaine
  • prèvêre prà dè tin po profitâ dè la vijita de la « Maison des Faverges » dèvan l’inmoda dè la verya. Pyan po le trajè du la gâre. Lin in défro po la verya. Mé dè rinchènyèmin achtou ke le pyan dè mobilitâ de la FeVi cherè konyu.
Inscriptions
 

Martchi di Dzin

Dèkouvrâdè l’artijana lokal in flânin a travê le martchi di Dzin, di fribordzè pachyenâ pê lou travô. Di dèmonchtrachyon dè poteri dè Grevire, dè hyotsè in ahyi, dè vitrô, d’âchiyâre, d’apikulteu, ti hou j’artijan vo j’in betèron pyin la yuva.

 

Pop Pop Poya

Ou « Jardin Doret », lè piti l’aron l’èpâhyo dè lou dèmorâ in chayin lou j’idé. Avoui le konsèpt « Pop Pop Poya », lè j’infan poron fére lè pèrchenâdzo d’ouna Poya orijinale grâthe i diferin chupâ d’apri l’âdzo. K’ôchè 5, 8 oubin 12 an, tsakon li tràvèrè chon konto. Afin dè mantinyi chi chovinyi, cherè pochubyo dè vêre è rèvêre ha Poya « dijitale » chu le « site internet » dè la dzornâye di fribordzè, apri ke cherè pachâye.

 

Lè j’inkontornâbyo

Rèjèrvouâre d’artichte, le tchinton dè Friboua imènèrè lè vijiteu de la fitha di venyolan din di mondo pyechintamin divê. Avu notamin oun’ôvra partichipativa ke léchèrè ouna trache din l’ichtouâre dè la fitha, le chavê fére fribordzè l’arè ouna pyathe dè favâ è chè maryèrè in chorèprêcha avu d’ôtro domêne.

 
 

Radi dè manêre mujikale

Invide d’achichtâ a on konchê intimo po le min orijinalo? Inbârkâdè po oun’intèrmèdo mujikale dzuyè chu on radi dè bou bâti po l’okajyon! Chu chi chitzo ke flotèrè a la kadanthe di vâgè, di menèthrê fro delé bon k’inmènèron lè vijiteu din ouna kotse dè paradi brechi pè le Léman.

 

Highline

On chpèktâhyo a trochâ le chohyo! Akrotchi ou dèchu dè l’ivouè, di j’akteu propoujèron di dèmothrâye in lê chu lou Highline. In kolaborachyon avu lè j’organijâteu dou chpèktâhyo "The Highline Extreme" ke rèuni ti lè j’an lè mêyà highliners dou mondo ou dèchu dou Molèjon, lè rèkouâ dè hou j’akteu in lê, charon vo fére a vivre di chanchachyon yôtè!

 

Èchpojichyon artictika

Dèvan l’Alimentarium, l’è le chavê fére fribordzè ke cherè betâ in vayà. Lè vijiteu poron lou promenâ ou fi dè l’ivouè in admirin diferintè j’ôvrè.

 

Ôvra partichipativa

E che lè j’artichte, cheran vo? chu lè j’ègrâ dè La Tour-de-Peilz, lè vijiteu cheron invitâ a kontribuâ a ouna grant’ôvra partichipativa ke va èvoluâ todoulon dè la dzornâye. Ha mouda l’è pâ adi konpyètamin fournête, è le kontunu va adi èvoluâ..

 

Silent Disco

Po ti lè vijiteu ke kouâdran kontinuâ la fitha apri le kutchi dou chèlà, ouna Silent Disco vo j’inmênèrè danhyi du 21h a 02h00 dou matin ou Jardin-Doret.

Vo j’ari dinche l’èpâhyo dè vibrâ è danhyi intrè j’êmi è famyè chu di mèlodiyè ichtorike. Lè kâchke ke vo cheron prèthâ in èthandzo dè vouthra kârta d’idantitâ, vo faron akutâ 3 tsênè dè mujika ke vo pori akutâ ou bon grâ dè vouthrè j’invide.

Du l’Abbé Bovet a David Guetta, n’in d’a po ti lè go.

 

Friboua, lè j’amihyâ

To kemin la fitha di venyolan in li mimo, chi konchèpte artichtiko betè le vin a l’anâ.lè duvè moudè fouârtè ke chon la molache fribordzèje è lè j’amithyâ d’ouna botoye dè vin partadja intrè j’êm,i chè maryèron a l’okajyon dè ha dzornâye fribordzèje. Ti lè vijiteu de la fitha cheron invitâ a vèchâ lè richto dè lou vêro a la fritha don pechin mochi dè molache po ke la rotse ch’inbibichè, ou fi di j’àrè, dè l’amythyâ dè ti.

 

Dèfelâ è kortéje

 
 

Dèfelâ

Dèfelâ a 11 h. lè j’ôtoritâyè ofichyalè dou tchinton dè Fribouà mârtsèron lè kotyè than mêtre ke lè chèpâron dè la tèrache dè la konfrèrie di Vinyolan.

Po chin fére, cheron akonpanyè pè lè rèprèjintin ofichyal dou tchinton, chta dre , la Landwehr è le kontinjan di Grenadiers. "Programe" - ouâdre è organijachyon di partichipin.

 

Kortéje

Kortéje a 16 h., le kortéje ofichyal inmênèrè lè Kouâ dè mujika, lè Kà, lè Mènèthrê è lè j’Artichte du le keminhyèmin dou Quai Roussy à Entre-Deux-Villes tantyè ou Jardin du Rivage.

Kotyè groupe ke dèfelèron din le kortéje chè préjintèron achebin chu lè diferintè pyathè dè la Fitha, to doulon dè la dzornâye.